пятница, 18 марта 2016 г.

11 тӧлысь

Меным 11 тӧлысь. Сьӧктаӧй - 9000 грамм, тушаӧй - 72 см.
Ме вӧчи медводдза воськовъяс батьӧ дорӧ. Тайӧ вӧлі март 23-ӧд лунӧ 9 час да 25 минутын.
Ставсӧ дзеба шкапъясӧ да диван костӧ, он на меысь нинӧм босьт! А нӧшта радейта котравны Максим да Аня бӧрся.

четверг, 17 марта 2016 г.

Шуд

     Коми газет-журнал лыддьыны тшӧкыда пыраліс Владимир Павлович Доронин, коми гижысь П.Г. Доронинлӧн пиыс. Лыддьысянінын уджалысьяс дорӧ пыр нимӧн шыасьліс. Унатор йылысь сёрнитім пӧрысь морткӧд. Векджык батьсӧ казьтыліс, репрессия кадӧ сылысь гижны повзьӧмсӧ. Но мӧд ногасӧ пӧ вӧлі оз позь, правдайтіс батьсӧ пиыс, сэки коліс овны чӧв, мед эз пуксьӧдны, челядьсӧ поліс воштыны.
     Важсӧ казьтылігӧн сёрнитім и талунъя олӧм йылысь. Вежӧрӧ пуксисны Владимир Павловичлӧн коми йӧз йылысь кывъяс. Збыльсӧ висьталіс вежавидзысь мужичӧй – комиясыд пӧ му вылын быдмисны, шома шыд да пачысь рок вылын вынсялісны, йӧз муысь воӧм сёян вылӧ веж оз пет, а шудаӧсь ми сэк, кор котырын лад да ӧта-мӧдӧс пыдди пуктӧм, кор ставӧн ӧтув.
     Сьӧлӧмлы матын лоины тайӧ кывъясыс. А неважӧн и кывбурӧн петісны…
Снимокыс Евгений Козловлӧн
 
***
Ми, коми йӧз, му вылын чужим
Да муыслы копрасям нэм.
Ми сямнымӧс петкӧдлам уджын
Да юксям век ставнас, мый эм.

Ми мамъяслӧн шыдысь да рокысь
Эг видлывлӧй чӧскыдджык нур.
А суйӧрса пажын ми воклысь
Выль кӧръяснас оз кольмӧд юр.

Ми пӧльяслӧн чӧс туйӧд мунам,
Мед пиянлы индыны шуд…
А шуд кӧ эм – гажтӧмыс вунас
И шогсьыны некод оз кут!