четверг, 8 января 2015 г.

Музей

И.А. Куратов музейын челядьлы нуӧдсьӧ зэв муса выльвося гаж. Позьӧ гижӧдчыны да ветлыны. Любуш артисталӧ! Абу, дерт, кӧза Муза, но тшӧтш зэв Муса)).
 

среда, 7 января 2015 г.

Рӧштвоӧн!

Югыд мӧвпъяс да сӧстӧм лов!!!

вторник, 6 января 2015 г.

Гаж

Шойччан лунъясыс кузьӧсь да, век лоӧ мыйкӧ мӧвпыштны, мед челядьӧс гортысь петкӧдны. Веж мороз да, он тай гуляйт, со и ветлам то театрӧ, то кино видзӧдам, то боулингӧдз весиг воим! Медводдзаысь на мойвиис мачтӧ тюръявны - зэв тай гажа!)) Максим мӧд тшупӧд вылын лои - Кристина тьӧтсӧ сӧмын муртса эзджык суӧд, а сэсся ставнымӧс вермис панйыны тшӧт серти)).
 

воскресенье, 4 января 2015 г.

Ыж

Выль воыс пӧ - баля во.
Бе-е-е!!!
Баляыд кӧдзыд тӧвъяса Коми муад - пыдди пуктана пемӧс. Вурун кепысь-носкиыд да гын сапӧгыд - ок и добра!!! Мед кӧ баля вотӧ индӧмаӧсь мӧд войтыр - ми киӧн и кокӧн окотапырысь ошкам ки-кок шонтысьясӧс.
Уна кывбур-висьтын тайӧ пемӧссӧ ошкӧны и...
Со тай Николай Щукин гижӧ:
Олӧ гидын, чукля сюра,
Сетӧ уна небыд вурун,
Нёльнан кокас вожа гыж,
Тайӧ, дерт жӧ, лоӧ ЫЖ!
 

суббота, 3 января 2015 г.

Выльвося кӧчиль

     Аннушлы муртса на 7 ар, а телевизорӧд нин петкӧдлісны ворсӧмсӧ. Зэв мусаника кӧчиляліс. Сійӧ миян вильышиник да, весиг удитіс талясьыштны мӧд "кӧчилькӧд". А мед пӧ менсьым еджыд носкиӧс эз няйтчӧд да)). Татшӧм нин этшыс - оз сетчы некодлы)). Кӧч пасьсӧ ачым вури дай. Корсюрӧ тай мыйсюрӧ артмылӧ жӧ.
     А мамукӧй "Ас му вылынад" тшӧтш артисталӧ - вӧралысьясӧс аньяскӧд ӧттшӧтш колльӧдӧны.
     Кык ыждыд артистка инӧ!!!
 

пятница, 2 января 2015 г.

Шуда тасьті

     Удж вылын шуим пукыштны Выль во кузя. Быдӧн кӧсйысис сьӧрсьыс вайны кутшӧмкӧ чӧсмасянтор. Ме ёна эг мӧвпав - радейта "свеклӧ пася сола чери" вӧчны да, сійӧс и шуи вайны.
      40 мортӧн уджалам да, ичӧт дозъяд кӧ нуан - пыр и бырас. Шуи ыджыд дозйӧ вӧчны. Паськыд тасьтісӧ буретш неважӧн ньӧби - дыр кодь вежӧй петіс да...
     Свеклӧ-морков-картупель-лукыс аслам - гожӧмбыд быдті)), а чери-майонез-кольксӧ ньӧбны ковзис. Бура дыр ковмис ноксьыны салатнад, буретш пасьтасьны нин удж вылӧ колӧ, а ме век на кухняын бергала... Удиті жӧ.
     Быдӧн вайӧмаӧсь быдсямасӧ: пирӧг-шаньга, сола-юмовторъяс, пӧжалӧм-пуӧмторъяс... Нуръясьыштім да, директорным шуӧ, колӧ пӧ бӧрйыны медчӧскыд сёян. Унджыкыс менам салат вылӧ индісны)). Весиг вичмис кампет да акань)).
     Шуда, инӧ, тасьтіӧй вӧлӧма!
 

четверг, 1 января 2015 г.

Выль воӧн!

Выль воыс мед ваяс радлун да шуд!